काठमाडौं । उत्तर कोरियाले रुसमा थप ठूलो संख्यामा सैनिक पठाएको युक्रेनी सैन्य गुप्तचरले दाबी गरेको छ। नयाँ चरणको सैन्य तैनाथीमा करिब ८ हजार ५ सय उत्तर कोरियाली सैनिक रहेको र तीमध्ये करिब ४ सय जना ड्रोन अपरेटर रहेको बताइएको छ।
युक्रेनी पक्षका अनुसार यी ड्रोन अपरेटर युक्रेनभित्रका लक्ष्यमा आक्रमण गर्न सक्ने क्षमताका छन्। उत्तर कोरियाली सैनिक तैनाथीमा आक्रामक ड्रोन क्षमता समावेश भएको यो पहिलो पुष्टि भएको घटना भएको दाबी गरिएको छ।
नयाँ सैनिक टोली मुख्यतः रुसको कुर्स्क क्षेत्रमा केन्द्रित रहेको जनाइएको छ। उनीहरूसँगै ड्रोन अपरेटर, इन्जिनियर तथा बारुद र विस्फोटक पदार्थ हटाउने विशेषज्ञसमेत रहेको युक्रेनी गुप्तचरको भनाइ छ।
युक्रेनी रक्षा गुप्तचरका एक वरिष्ठ अधिकारीलाई उद्धृत गर्दै सीएनएनले रुसी राष्ट्रपति भ्लादिमिर पुटिनले सेप्टेम्बरमा उत्तर कोरियाली नेता किम जोङ उनसँगको भेटमा थप ५० हजारसम्म सैनिक माग्न सक्ने सम्भावना रहेको जनाएको छ।
युक्रेनी पक्षको दाबीअनुसार सन् २०२४ देखि उत्तर कोरियाली सैनिक रुसमा तैनाथ हुन थालेपछि हालसम्म करिब २५ हजार सैनिकले पालैपालो रुसी सेनासँग सेवा गरिसकेका छन्।
नयाँ तैनाथीमा ड्रोन सञ्चालन गर्ने जनशक्ति समेत थपिएसँगै उत्तर कोरियाली सैनिकहरू प्रत्यक्ष रूपमा सीमा पार नगरी रुसबाटै युक्रेनी लक्ष्यविरुद्ध ड्रोन आक्रमणमा सहभागी हुन सक्ने अवस्था बन्ने विश्लेषण गरिएको छ।
स्रोत : CNN
