रुकुम पश्चिम — रुकुम पश्चिमको सानीभेरी गाउँपालिका–६ देउताखोलानजिक जिप दुर्घटना हुँदा दुई जनाको ज्यान गएको छ भने घाइतेहरूको हेलिकप्टरमार्फत उद्धार गरिएको छ।
आइतबार बिहान भएको दुर्घटनामा ज्यान गुमाउनेमा त्रिवेणी गाउँपालिका–१ रुघाका जिप चालक सुन्दर खड्का मगर र सानीभेरी गाउँपालिका–६ की करिब १६ वर्षीया प्रेमकला पुन रहेको जिल्ला प्रहरी कार्यालयले जनाएको छ।
दुर्घटनामा घाइते भएका यात्रुहरूको अवस्था हेरेर थप उपचारका लागि हेलिकप्टरमार्फत उद्धार गरिएको हो। दुर्घटनापछि स्थानीय, प्रहरीलगायतको टोली घटनास्थलमा पुगेर उद्धारमा जुटेको थियो।
प्रहरीका अनुसार जिप दुर्घटनाको कारणबारे प्रारम्भिक अनुसन्धान भइरहेको छ। घटनाको थप विवरण संकलन गर्ने कामसमेत जारी रहेको जनाइएको छ।
