काठमाडौं । नेपाल कम्युनिष्ट पार्टी (बहुमत) ले प्रधानमन्त्री बालेन्द्र शाह (बालेन) ले संसदमा दिएको ‘नेपालले पनि भारतको भूमि मिचेको छ’ भन्ने अभिव्यक्तिलाई देशद्रोही, गैरजिम्मेवार र राष्ट्रिय हितविपरीत भएको आरोप लगाएको छ। पार्टीले उक्त अभिव्यक्तिप्रति कडा आपत्ति जनाउँदै प्रधानमन्त्रीलाई तत्काल बर्खास्त गर्न माग गरेको छ।
महासचिव कञ्चनद्वारा जारी प्रेस वक्तव्यमा नेपालको लिम्पियाधुरा, लिपुलेक र कालापानीलगायतका भूभागमा भारतको अतिक्रमणबारे कूटनीतिक पहल गर्नुपर्ने बेला प्रधानमन्त्री स्वयंले नेपालमाथि नै आरोप लगाउनु गम्भीर र आपत्तिजनक भएको उल्लेख गरिएको छ। यदि नेपालले भारतीय भूमि मिचेको दाबी सत्य हो भने त्यसको प्रमाण सार्वजनिक गर्न पनि पार्टीले चुनौती दिएको छ।
प्रधानमन्त्रीको अभिव्यक्तिविरुद्ध संघर्षका कार्यक्रमसमेत घोषणा गर्दै नेकपा (बहुमत) ले १८ जेठमा कोणसभा र २० जेठमा मशाल जुलुस गर्ने जनाएको छ। पार्टीले सम्पूर्ण देशभक्त नागरिक र युवा शक्तिलाई विरोध आन्दोलनमा सहभागी हुन आह्वान समेत गरेको छ।
