दाङको तुलसीपुरस्थित मालपोत कार्यालय परिसरबाट प्रहरीले केही बिचौलिया र लेखापढी व्यवसायीलाई नियन्त्रणमा लिएको छ। सेवाग्राहीलाई अनावश्यक झन्झट सिर्जना गर्ने र अतिरिक्त रकम असुल्ने गुनासो बढेपछि उनीहरूलाई पक्राउ गरिएको हो।
जिल्ला प्रहरी कार्यालय दाङका अनुसार कार्यालयभित्रै सक्रिय बिचौलिया समूहले सेवाग्राहीलाई सास्ती दिने गरेको सूचना पाएपछि कारबाही अघि बढाइएको हो। पक्राउ परेकाहरूको परिचय भने हालसम्म सार्वजनिक गरिएको छैन।
नियन्त्रणमा लिइएकाहरूलाई इलाका प्रहरी कार्यालय तुलसीपुरमा राखेर थप अनुसन्धान भइरहेको प्रहरीले जनाएको छ। सरकारी सेवामा बिचौलियाको प्रभाव घटाउन प्रहरी सक्रिय रूपमा परिचालन हुँदै आएको छ।
