काठमाडौं — हाल नेपालमा पश्चिमी न्यूनचापीय प्रणालीसँगै स्थानीय वायुको प्रभाव देखिएको छ, जसका कारण देशभर मौसम बदली भएको छ। जल तथा मौसम विज्ञान विभाग अन्तर्गतको मौसम पूर्वानुमान महाशाखाका अनुसार विभिन्न प्रदेशका पहाडी तथा हिमाली भूभागमा आंशिक वर्षा र हिमपात भइरहेको छ।
महाशाखाका अनुसार अहिले कोशी प्रदेश, गण्डकी प्रदेश र कर्णाली प्रदेश का केही स्थानमा हल्का वर्षा तथा हिमपात भइरहेको छ
आज दिउँसो देशका अधिकांश पहाडी र हिमाली क्षेत्रमा बदली रहनेछ भने तराईका भूभागमा आंशिक बदली रहने पूर्वानुमान गरिएको छ। पहाडी तथा हिमाली क्षेत्रमा मेघगर्जन, चट्याङ, असिना र हुरीबताससहित मध्यम वर्षा तथा हिमपात हुन सक्ने सम्भावना रहेको छ।
त्यस्तै, लुम्बिनी प्रदेश र सुदूरपश्चिम प्रदेश का तराई क्षेत्रमा केही स्थानमा तथा अन्य तराईका एक-दुई स्थानमा हल्का वर्षा हुन सक्ने बताइएको छ। मधेस प्रदेश सहित कोशी, बागमती प्रदेश र गण्डकीका तराई क्षेत्रमा हुरीबतासको समेत सम्भावना रहेको छ।
आज राति भने हिमाली क्षेत्रमा बदली कायम रहने, पहाडी क्षेत्रमा आंशिक बदली रहने र तराई क्षेत्रमा मौसम सामान्यतया सफा रहने अनुमान गरिएको छ। राति पनि केही हिमाली र पहाडी क्षेत्रमा हल्का वर्षा र हिमपातको सम्भावना रहेको महाशाखाले जनाएको छ।
मौसममा आएको यो परिवर्तनसँगै मेघगर्जन, चट्याङ र हुरीबतासबाट सतर्क रहन नागरिकलाई आग्रह गरिएको छ।
