काठमाडौँ। खाना पकाउने ग्यास महँगो मूल्यमा बिक्री गरेको आरोपमा भक्तपुरबाट दुई जना पक्राउ परेका छन्।
प्रहरीका अनुसार सूर्यविनायक नगरपालिका–३ ब्रम्हनगरमा जनरल स्टोर सञ्चालन गर्दै आएका २५ वर्षीय उमेश साह र भक्तपुर नगरपालिका–२ इटाछेमा ग्यास बिक्री गर्दै आएका ४१ वर्षीय राजेश कर्माचार्य पक्राउ परेका हुन्।
उपभोक्तालाई तोकिएको मूल्यभन्दा बढी रकम लिएर ग्यास बिक्री भइरहेको सूचनापछि अनुसन्धान अघि बढाइएको प्रहरीले जनाएको छ। साहले प्रतिसिलिन्डर २८ सय रुपैयाँसम्ममा ग्यास बिक्री गरेको आरोप छ।
उपत्यका अपराध अनुसन्धान कार्यालयको टोलीले उनीहरूको नियन्त्रणबाट ७५ थान भरिएका हिमाल ग्यासका सिलिन्डर र १४ थान सगर ग्यासका सिलिन्डर बरामद गरेको जनाएको छ।
पक्राउ परेका दुवैजनामाथि थप अनुसन्धानका लागि जिल्ला प्रहरी परिसर भक्तपुरमार्फत कानुनी प्रक्रिया अघि बढाइएको छ।
