दार्चुलाको व्याँस गाउँपालिका–४ सुन्सेरास्थित सम्पाल माध्यमिक विद्यालय का प्रधानाध्यापक बलदेव सिंह धामीले लामो फेसबुक स्टाटस लेख्दै आत्महत्या गरेका छन्।
आत्महत्याअघि सामाजिक सञ्जालमा सार्वजनिक गरेको स्टाटसमा धामीले आफूलाई विद्यालयभित्रकै केही शिक्षक, स्थानीय व्यक्ति तथा ठेकेदार समूहले झुटा आरोप लगाएर मानसिक रूपमा प्रताडित बनाएको उल्लेख गरेका छन्। उनले विद्यालयलाई नमुना बनाउने क्रममा गरेका शैक्षिक तथा भौतिक पूर्वाधार विकासका कामहरूको विस्तृत विवरणसमेत सार्वजनिक गरेका छन्।
धामीले केही व्यक्तिहरूमाथि षड्यन्त्रपूर्वक आफूलाई बलात्कार आरोपमा फसाउने प्रयास गरिएको आरोप लगाउँदै घटनाको निष्पक्ष छानबिन, कल विवरण परीक्षण तथा दोषीमाथि कडा कारबाहीको माग गरेका छन्।
उनले आफ्ना परिवारका सदस्यलाई सम्बोधन गर्दै छोराहरूलाई साहसी बन्न, श्रीमतीलाई परिवारको ख्याल गर्न आग्रह गरेका छन् भने आफ्नो शवको डीएनए परीक्षण गर्नसमेत अनुरोध गरेका छन्।
