काठमाडौं। अखिल (क्रान्तिकारी) विश्वविद्यालय तथा सिटीइ भिटी विशेष प्रदेश समिति ले काठमाडौं विश्वविद्यालयमा हालसालै गरिएको नियुक्ति प्रक्रियाप्रति गम्भीर आपत्ति जनाएको छ।
उक्त विद्यार्थी संगठनले विश्वविद्यालय कार्यकारी परिषद्ले एकेडेमिया–इन्डष्ट्री कोअर्डिनेटर तथा एसोसियट डिनहरूको नियुक्ति गर्दा राजनीतिक भागबण्डा गरिएको आरोप लगाइएको छ।
संयोजक पारस राहदी मगर द्वारा जारी हस्ताक्षरित बिज्ञप्ति अनुसार उक्त नियुक्तिमा राष्ट्रिय स्वतन्त्र पार्टी, नेपाली कांग्रेस र नेपाल कम्युनिष्ट पार्टी (एमाले) बीच भागबण्डा गरिएको दाबी गरिएको छ।
अखिल (क्रान्तिकारी)ले विश्वविद्यालयजस्तो प्राज्ञिक संस्थामा राजनीतिक हस्तक्षेप अस्वीकार्य हुने बताउँदै यस्ता गतिविधि तुरुन्त बन्द गर्न सम्बन्धित पक्षको ध्यानाकर्षण गराएको छ। साथै, संगठनले पारदर्शी, निष्पक्ष र योग्यतामा आधारित नियुक्ति प्रक्रिया अपनाउन माग गर्दै यस्ता कार्यविरुद्ध निरन्तर संघर्ष गर्ने चेतावनी दिएको छ।
अखिल (क्रान्तिकारी) नेकपा (बहुमत) निकट बिद्यार्थी संगठन हो । 
