लुम्बिनी प्रदेशमा यस वर्षको माध्यमिक शिक्षा परीक्षा (एसईई)मा झण्डै ८९ हजार विद्यार्थी सहभागी हुने भएका छन्। शिक्षा तथा सामाजिक विकास निर्देशनालयका अनुसार प्रदेशका १२ जिल्लाबाट नियमिततर्फ ७२ हजार ४४ जना र ग्रेडवृद्धितर्फ १६ हजार ९२१ जना गरी कुल ८८ हजार ९६५ परीक्षार्थी परीक्षा दिनेछन्।
परीक्षाका लागि प्रदेशभर ३३८ वटा केन्द्र निर्धारण गरिएको छ। गत वर्षको तुलनामा यस वर्ष ५ हजार ९४३ विद्यार्थी घटेका छन्। गत वर्ष ९४ हजार ९०८ जना सहभागी भएका थिए।
एसईई १९ चैतदेखि २९ चैतसम्म बिहान ८ बजेदेखि ११ बजेसम्म सञ्चालन हुनेछ। परीक्षा मर्यादित, निष्पक्ष र शान्तिपूर्ण बनाउन आवश्यक तयारी अन्तिम चरणमा पुगेको निर्देशनालयले जनाएको छ।
जिल्लागत रूपमा रुपन्देहीमा सबैभन्दा बढी २१ हजार ३०० परीक्षार्थी सहभागी हुँदा रुकुम पूर्वमा सबैभन्दा कम ९१३ जना रहेका छन्।
