दाङ । दाङको घोराही उपमहानगरपालिका–१४ झिगौरामा सञ्चालन भइरहेको लुम्बिनी प्रदेश स्तरीय साना तथा घरेलु उद्योग, सांस्कृतिक, पर्यटन तथा कृषि महोत्सव–२०८२ मा आज चैत १२ गते चर्चित गायिका एलिना चौहान आउने भएकी छन्।
नेपाल घरेलु तथा साना उद्योग महासंघ दाङ जिल्ला महिला उद्यमी समितिको आयोजनामा फाल्गुन २८ गतेदेखि सुरु भएको महोत्सव चैत १५ गतेसम्म सञ्चालन हुने आयोजकले जनाएको छ।
महोत्सवको आज चैत १२ गतेको विशेष आकर्षणका रूपमा लोकप्रिय गायिका एलिना चौहानको प्रस्तुति रहने कार्यक्रम तय गरिएको छ। त्यस्तै सोही दिन गायक सुमन परियार, गायक विनोद लामा, प्रतिक्षा बिष्ट, गीता धर्ती, वर्षा मगर लगायत कलाकारको पनि प्रस्तुति रहने आयोजकले जानकारी दिएको छ।
कार्यक्रममा उद्घोषक शान्ताराम सेन्चुरी, प्रेम शर्मा तथा विष्णु तुतारले सञ्चालन गर्नेछन् भने डान्सर एन्जल लामा र डान्सर समूहको नृत्य प्रस्तुति पनि रहनेछ। साथै लाइभ दोहोरी तथा स्थानीय कलाकारहरूको बेजोड प्रस्तुति महोत्सवको अर्को मुख्य आकर्षण रहने बताइएको छ।
आयोजकका अनुसार महोत्सवमा घरेलु तथा साना उद्योगका उत्पादन, कृषि सामग्री, स्थानीय परिकार, सांस्कृतिक कार्यक्रम तथा पर्यटन प्रवर्द्धनसँग सम्बन्धित विभिन्न स्टल राखिएका छन्। महोत्सवले स्थानीय उत्पादनको बजारीकरण र पर्यटन प्रवर्द्धनमा टेवा पुग्ने विश्वास गरिएको छ।
