काठमाडौं। प्रधानमन्त्री सुशीला कार्की भदौ २३–२४ को घटनाबारे छानबिन गर्न बनेको जाँचबुझ आयोगको प्रतिवेदन सार्वजनिक गर्ने तयारीमा जुटेकी छन्। आयोगले दुई साताअघि नै प्रतिवेदन बुझाए पनि हालसम्म सार्वजनिक गरिएको थिएन।
प्रतिवेदन सार्वजनिक गर्न राजनीतिक दल, अभियन्ता तथा विद्यार्थीहरूले दबाब बढाएपछि प्रधानमन्त्री कार्कीले मन्त्रीहरूसँग परामर्श थालेकी बताइएको छ। माइतीघर लगायतका स्थानमा प्रतिवेदन सार्वजनिक गर्न माग गर्दै प्रदर्शनसमेत भइरहेको छ।
यसैबीच, चैत १३ गते बालेन शाह प्रधानमन्त्री नियुक्त हुने तयारी छ। पद हस्तान्तरणको तयारीस्वरूप प्रधानमन्त्री कार्कीले सरकारी निवास बालुवाटार खाली गर्ने क्रममा रहेको स्रोतले जनाएको छ।
प्रधानमन्त्रीको सचिवालयका अनुसार प्रतिवेदन सार्वजनिक गर्ने विषयमा छलफल भइरहेको छ र निर्णय छिट्टै हुन सक्ने सम्भावना छ।
