दाङ। बाँके मालपोत कार्यालयका तत्कालीन प्रमुख मालपोत अधिकृत तथा हाल दाङको घोराही उपमहानगरपालिकाका प्रमुख प्रशासकीय अधिकृत ऋषिराम केसी भ्रष्टाचार मुद्दामा तानिएका छन्।
अख्तियार दुरुपयोग अनुसन्धान आयोगले सरकारी जग्गा गैरकानूनी रूपमा व्यक्तिको नाममा दर्ता गराएको अभियोगमा केसीसहित नौ जनाविरुद्ध विशेष अदालतमा आरोपपत्र दायर गरेको हो।
अख्तियारका अनुसार केसीले मालपोत अधिकृत अशोककुमार भट्टराईलगायतसँग मिलेमतो गरी झुट्टा सर्जमिन मुचुल्का, गलत सिफारिस र निर्णयका आधारमा सरकारी नाममा रहनुपर्ने जग्गा व्यक्तिको नाममा नामसारी गराएका छन्। उक्त जग्गा तत्काल प्रचलित मुलुकी ऐनको अपुताली महलअनुसार नेपाल सरकारको नाममा कायम हुनुपर्ने थियो।
सर्वोच्च अदालतबाट समेत अपुताली हक नपुग्ने भनी अन्तिम फैसला भइसकेको अवस्थामा पनि गैरकानूनी रूपमा जग्गा दर्ता गरिएको अख्तियारको ठहर छ।
यसबाट राज्यलाई करिब ४३ लाख ३० हजार रुपैयाँभन्दा बढीको क्षति पुगेको जनाइएको छ। मुद्दा दायरसँगै केसी निलम्बनमा परेपछि घोराही उपमहानगरपालिका प्रमुख प्रशासकीय अधिकृतविहीन बनेको छ।
