काठमाडौं । उज्यालो नेपाल पार्टी (उनेपा) भित्र आन्तरिक असन्तुष्टि सतहमा आएको छ । पार्टीका तीन केन्द्रीय सदस्यले साधारण सदस्यसमेत नरहने गरी सामूहिक राजीनामा दिएपछि उनेपाभित्रको संगठनात्मक कमजोरी पुनः चर्चामा आएको छ ।
राजीनामा दिने नेताहरूमा समानुपातिक उम्मेदवारसमेत रहेका डकेन्द्रसिंह थेगिम, ज्ञानबहादुर गुरुङ र अमर इजम छन् । उनीहरूले पार्टीभित्र लोकतान्त्रिक अभ्यास कमजोर रहेको, विचार, विधि र कार्यदिशा अस्पष्ट रहेको तथा पहिचानसम्बन्धी एजेन्डा लिखित रूपमा नआएको गम्भीर आरोप लगाएका छन् ।
राजीनामापछि सार्वजनिक संयुक्त विज्ञप्तिमा उनीहरूले यस्ता संरचनात्मक कमजोरीका कारण पार्टीभित्र बसेर राजनीतिक उद्देश्य हासिल गर्न नसकिने निष्कर्षमा पुगेको उल्लेख गरेका छन् । पार्टी नेतृत्वले पहिचान, आत्मनिर्णय र समावेशी राजनीतिका मुद्दालाई स्पष्ट दिशानिर्देश दिन नसकेको उनीहरूको भनाइ छ ।
डकेन्द्रसिंह थेगिम पार्टी गठनअघि प्रदेश नम्बर १ पुनःनामकरण संयुक्त संघर्ष समितिका संयोजक थिए । त्यस्तै ज्ञानबहादुर गुरुङ र अमर इजम यसअघि नागरिक उन्मुक्ति पार्टीमा सक्रिय थिए । उनीहरू अरुण पूर्वका नौ जिल्लालाई ‘लिम्बुवान’ नामाकरण गर्नुपर्ने मागसहित लामो समयदेखि पहिचान आन्दोलनको नेतृत्व गर्दै आएका नेता हुन् ।
उज्यालो नेपाल पार्टीले थेगिमलाई आदिवासी जनजाति क्लस्टरतर्फ समानुपातिक उम्मेदवारको तेस्रो नम्बरमा राखेको थियो । तर पार्टीको आन्तरिक संरचना र एजेन्डाप्रति असन्तुष्टि जनाउँदै उनले समेत पार्टी परित्याग गरेका छन् ।
राजीनामापछि नेताहरूले आफूहरू स्वतन्त्र रूपमा रहेर संयुक्त पहिचानवादी मोर्चालाई सुदृढ बनाउने घोषणा गरेका छन् । पहिचान, आत्मनिर्णय र समावेशी राजनीतिका मुद्दालाई नयाँ ढंगले अघि बढाइने उनीहरूको प्रतिबद्धता छ ।
यसअघि कुलमान घिसिङ नेतृत्वमा पार्टी गठन भएपछि रास्वपासँगको एकता र त्यसपछिको विभाजनकै क्रममा केही नेताहरू रास्वपामै सीमित हुँदा उज्यालो नेपाल पार्टीले प्रारम्भिक राजनीतिक धक्का व्यहोरेको थियो । पछिल्लो घटनाक्रमलाई पार्टीभित्रको आन्तरिक असन्तुष्टि र नेतृत्वप्रतिको गम्भीर चुनौतीका रूपमा हेरिएको छ ।
