काठमाडौं – आगामी फागुन २१ गते हुने प्रतिनिधिसभा निर्वाचनमा प्रत्यक्षतर्फ दलित समुदायको सहभागिता अत्यन्तै न्यून देखिएको छ । ठूला राजनीतिक दलहरूले सीमित जिल्लामा मात्रै दलित उम्मेदवार अघि सारेका छन् ।
नेपाली कांग्रेसले बझाङबाट प्रकाश रसाइली स्नेहीलाई मात्र उम्मेदवार बनाएको छ । एमालेले डडेल्धुराबाट चक्र स्नेही र बर्दिया–२ बाट विमला विकलाई टिकट दिएको छ । नेकपाले स्याङ्जा–२ बाट पदम विश्वकर्मा र कञ्चनपुर–३ बाट मानबहादुर सुनारलाई उम्मेदवार बनाएको छ भने रास्वपाले बाँके–३ बाट खगेन्द्र सुनारलाई अघि सारेको छ ।
दलित अगुवाहरूले दलितलाई भोट बैंकका रूपमा मात्र प्रयोग गरिएको र अवसरबाट वञ्चित गरिएको आरोप लगाएका छन् । दलित महिला उत्थान सङ्घकी अध्यक्ष विन्दु परियारले प्रत्यक्ष निर्वाचनमा दलितको अनिवार्य प्रतिनिधित्व सुनिश्चित गर्नुपर्ने माग गरेकी छन् ।
अघिल्ला संसद् र संविधानसभाका तथ्याङ्कले पनि दलित प्रतिनिधित्व क्रमशः घट्दो क्रममा रहेको देखाउँछन् । संविधानले समावेशीताको हक सुनिश्चित गरे पनि व्यवहारमा कार्यान्वयन कमजोर रहेको भन्दै सरोकारवालाले चिन्ता व्यक्त गरेका छन् ।
