दाङ । नेपाल कम्युनिस्ट पार्टी (बहुमत) ले आफ्ना केन्द्रीय सदस्य तथा दाङ जिल्ला सचिव कमरेड सजकलाई विनाकारण पक्राउ गरिएको भन्दै कडा आपत्ति जनाएको छ। पार्टी केन्द्रीय समितिद्वारा जारी प्रेस वक्तव्यमा जनसंविधानका लागि देशव्यापी जनसंघर्ष अभियान चलिरहेका बेला राज्य पक्षबाट गरिएको गिरफ्तारीलाई गैरकानुनी र दमनकारी कदमको संज्ञा दिइएको छ।
वक्तव्यअनुसार पुष १५ गते दाङको बाँगलाचुली क्षेत्रमा जनसंघर्ष अभियानअन्तर्गत नारा लेख्ने क्रममा कमरेड सजकलाई पक्राउ गरिएको हो। पार्टीले वर्तमान राजनीतिक अवस्थाको उल्लेख गर्दै देशको सार्वभौमिकता, स्वाधीनता, जनअधिकार र भ्रष्टाचारविरुद्ध आफूहरू निरन्तर संघर्षरत रहेको जनाएको छ।
सरकार तथा सत्तापक्षबाट भइरहेको देशघाती र जनविरोधी क्रियाकलापविरुद्ध जनसंघर्ष अभियान सञ्चालन भइरहेकै बेला गरिएको यो गिरफ्तारीले अभिव्यक्ति स्वतन्त्रता र राजनीतिक अधिकारमाथि हस्तक्षेप गरेको पार्टीको ठहर छ।
पार्टीले गिरफ्तार नेता सजकलाई तत्काल बिनाशर्त रिहा गर्न सरकारसँग जोडदार माग गरेको छ। साथै, मागको बेवास्ता गरिएमा थप संघर्षका कार्यक्रम सार्वजनिक गर्दै सशक्त प्रतिरोधमा उत्रिने चेतावनी पनि दिएको छ। हिजाे शुक्रवार पार्टी सेक्रेटरी सजक सँगै बिद्यार्थी नेता नरेन्द्र बिश्वकर्मा र कमल पुन समेतलाइ गिरप्तार गरिएकाे थियाे ।
