दाङ — नेपाल भूमिहीन, सुकुम्बासी तथा अव्यवस्थित बसोबासी संरक्षण समिति दाङले आज राष्ट्रिय स्वतन्त्र पार्टी (रास्वपा) को जिल्ला कार्यालय दाङमा एक घण्टा कालोपट्टि बाँधेर धर्ना दिएको छ ।
समितिले विभिन्न स्थानमा सुकुम्बासी बस्तीमाथि भइरहेको डोजर आतंक, बस्ती हटाउने कार्य र पीडित नागरिकमाथि भइरहेको अन्यायप्रति सरकार तथा राजनीतिक दलको ध्यानाकर्षण गराउन धर्ना कार्यक्रम गरिएको जनाएको छ ।
समितिका संयोजक विकास वलीद्वारा हस्ताक्षरित ध्यानाकर्षण पत्रमा बसोबासको सुनिश्चितता नगरी बस्ती हटाउने कार्य तत्काल रोक्न माग गरिएको छ । यस्तै प्रभावित नागरिकसँग संवाद र समन्वय गर्न, भूमिहीन तथा अव्यवस्थित बसोबासीको स्थायी समाधान खोज्न र आत्महत्या गर्न बाध्य भएका परिवारलाई राहत तथा क्षतिपूर्ति उपलब्ध गराउन पनि माग गरिएको छ ।
धर्नामा सहभागीहरूले “बस्न दे सरकार, बाँच्न दे सरकार” भन्ने नारासहित शान्तिपूर्ण प्रदर्शन गरेका थिए । उनीहरूले नागरिकको मानव अधिकार, सामाजिक न्याय र सुरक्षित आवासको अधिकार सुनिश्चित गर्न सरकार गम्भीर बन्नुपर्ने बताएका छन् ।
समितिले योजनाबद्ध पुनर्वासको व्यवस्था नगरी गरिने बस्ती हटाउने कार्यले सामाजिक द्वन्द्व निम्त्याउन सक्ने चेतावनीसमेत दिएको छ । अभियानका संयोजक बिकाश वली र प्रवक्ता प्रेम प्रशान्त बोहरा सहितको टोली रास्वपाका जिल्ला सचिव अशिम भूसाललाई ध्यानाकर्षण पत्र बुझाएको छ ।
