काठमाडौँ । भोटेकोशी बाढीपछि शव व्यवस्थापनबारे आफ्नो विगतको अनुभव सामाजिक सञ्जालमार्फत सार्वजनिक गरेका कोशी प्रदेशका सचिव कोशहरि निरौलालाई सरकारले रसुवाको टिमुरे क्षेत्रमा खटाएको छ।
कोभिड–१९ महामारीका बेला मोरङका प्रमुख जिल्ला अधिकारी रहँदा शव व्यवस्थापनमा आफूले अपनाएको प्रक्रियाबारे निरौलाले सामाजिक सञ्जालमा लेखेका थिए। उक्त सामग्री सार्वजनिक गरेको करिब एक दिनमै उनलाई बाढी प्रभावित क्षेत्रमा जिम्मेवारीसहित पठाइएको हो।
भूमि व्यवस्था, सहकारी, संघीय मामिला तथा सामान्य प्रशासन मन्त्रालयको निर्णयअनुसार निरौलाले टिमुरे केन्द्रित भएर बाढीमा मृत्यु भएकाहरूको शव व्यवस्थापन तथा सम्बन्धित कार्यमा समन्वय गर्ने जिम्मेवारी पाएका छन्।
आफूले विगतको अनुभव मात्र साझा गरेको बताउँदै निरौलाले सरुवाको कारणबारे आफूलाई स्पष्ट जानकारी नभएको प्रतिक्रिया दिएका छन्। उनले सामाजिक सञ्जालमा राखेको उक्त स्टाटस भने पछि हटाइसकेका छन्।
यसैबीच, पूर्व विराटनगर मेयर तथा कोशी प्रदेशका पूर्वमन्त्री भीम पराजुलीले सुझाव दिएको विषयलाई लिएर कर्मचारीलाई सरुवा गर्नु उचित नभएको टिप्पणी गरेका छन्। विपद्को समयमा सबै पक्ष एकजुट भएर उद्धार तथा व्यवस्थापनमा केन्द्रित हुनुपर्ने उनको भनाइ छ।
