दाङ । देउखुरीको गढवा गाउँपालिका–७ शान्तिपुरस्थित चन्दनपुर सामुदायिक वन क्षेत्रमा अजिङ्गर सर्पले बाख्रामाथि आक्रमण गरेपछि स्थानीयवासी त्रसित बनेका छन्।
सोमबार दिउँसो बाख्रा चराइरहेको क्रममा करिब १३ फिट लामो र ३० किलोभन्दा बढी तौल भएको अजिङ्गरले एक्कासी बाख्रालाई बेरेको थियो। घटना देखेपछि स्थानीयले तत्काल डिभिजन वन कार्यालय देउखुरीलाई खबर गरेका थिए।
सूचना प्राप्त भएपछि वन कार्यालयको टोली घटनास्थलमा पुगेर स्थानीयको सहयोगमा अजिङ्गरलाई सकुशल उद्धार गरी सुरक्षित रूपमा डिभिजन वन कार्यालय देउखुरीको जिम्मा लगाएको जनाएको छ।
अजिङ्गरको आक्रमणबाट गढवा गाउँपालिका–७ शान्तिपुर निवासी सरिता बुढाथोकीको बाख्रा मरेको छ। वन क्षेत्र आसपासमा यस्ता वन्यजन्तुको गतिविधि बढ्न सक्ने भएकाले सतर्क रहन सम्बन्धित निकायले स्थानीयलाई आग्रह गरेको छ।
