काठमाडौं । घनश्याम भुसालले कम्युनिस्ट आन्दोलनको वर्तमान संकटका लागि केपी शर्मा ओली र पुष्पकमल दाहाल (प्रचण्ड) लाई मुख्य जिम्मेवार ठहर गरेका छन्।
सामाजिक सञ्जालमार्फत भिडियो सन्देश सार्वजनिक गर्दै उनले यी दुई नेताको सत्तालिप्सा र नेतृत्वको असफलताले कम्युनिस्ट आन्दोलन कमजोर बनेको बताएका छन्।
२०७४ सालको निर्वाचनपछि कम्युनिस्टहरूले प्राप्त गरेको ठूलो राजनीतिक अवसर केपी ओलीको व्यक्तिवादी महत्वाकांक्षाका कारण गुमेको उनको आरोप छ। उनले पार्टी विभाजनपछि पनि नेतृत्वले पाठ नसिकेको भन्दै ओली र प्रचण्ड दुवैले सत्ता नछाड्नु आन्दोलनमाथिको अर्को घात भएको टिप्पणी गरे।
भुसालले जनयुद्ध र त्यसपछिका उपलब्धिलाई सही दिशामा लैजान नसकिएको भन्दै अब कम्युनिस्ट आन्दोलन जोगाउन ओली र प्रचण्डले नेतृत्व नयाँ पुस्तालाई हस्तान्तरण गर्नुपर्ने बताएका छन्। साथै उनले वामपन्थी समर्थक र कार्यकर्तालाई निराश नहुन आग्रह गर्दै आन्दोलनको पुनर्गठनका लागि नयाँ बहस र संवाद आवश्यक रहेको उल्लेख गरेका छन्।
