काठमाडौँ । देश र जनताको हितका लागि जीवन बलिदान गर्ने सहिदको स्मरणमा आज देशभर सहिद दिवस मनाइँदैछ । विभिन्न कार्यक्रमको आयोजना गरी सहिदप्रति श्रद्धाञ्जली अर्पण गरिँदैछ ।
प्रजातन्त्र स्थापनाका लागि ज्यान आहुति दिने धर्मभक्त माथेमा, दशरथ चन्द, गङ्गालाल श्रेष्ठ र शुक्रराज शास्त्रीसहित सम्पूर्ण सहिदको सम्झनामा प्रत्येक वर्ष माघ १६ गते यो दिवस मनाउने गरिन्छ । उनीहरूको बलिदानबाटै नेपालमा जहानियाँ राणा शासनको अन्त्य भई प्रजातन्त्र स्थापना भएको इतिहास छ ।
सहिद सप्ताहका रूपमा माघ १० देखि १६ गतेसम्म विविध कार्यक्रम हुँदै आएको छ ।
