काठमाडौँ । नेपाल कम्युनिस्ट पार्टी (माओवादी) ले फागुन २१ गते हुने भनिएको प्रतिनिधिसभा निर्वाचनलाई कथित निर्वाचनको संज्ञा दिँदै पूर्ण रूपमा अस्वीकार गरेको छ । पार्टीले विभिन्न जिल्लामा निर्वाचन प्रचारप्रसार गतिविधि निषेध गरेको घोषणा गर्दै त्यसको उल्लङ्घन भए प्रतिकार गरिने चेतावनी दिएको छ ।
केन्द्रीय कार्यालय सचिव दिपकको हस्ताक्षर द्वारा जारी प्रेस विज्ञप्तिमा अमेरिकी साम्राज्यवाद र भारतीय विस्तारवादका एजेन्टहरूद्वारा दलाल संसदीय व्यवस्थामार्फत निर्वाचन थोपर्ने प्रयास भइरहेको आरोप लगाइएको छ । पार्टीले यस्तो निर्वाचनले देशको राष्ट्रियतामाथि गम्भीर खतरा उत्पन्न गरेको दाबी गरेको छ ।
विज्ञप्तिअनुसार धादिङ, नुवाकोट, चितवन, बारा, पर्सा, मकवानपुर, सर्लाही, महोत्तरी, सिराहा, सप्तरी, दाङ, अर्घाखाँची, प्युठान, बाजुरा, बझाङ, तेह्रथुम, इलाम, पाँचथर, संखुवासभा, भोजपुर, सल्यान, कालिकोट, कपिलवस्तु, काभ्रे लगायतका जिल्लामा निर्वाचनसम्बन्धी प्रचारप्रसार पूर्ण रूपमा निषेध गरिएको छ ।
निषेधित जिल्लामा चुनावी गतिविधि सञ्चालन भए नेपाली जनताद्वारा प्रतिकार गरिने चेतावनी दिँदै पार्टीले सम्पूर्ण सञ्चारकर्मी, पत्रकार, बुद्धिजीवी तथा संघ–संस्थालाई उक्त निर्णयको सम्मान गर्न आग्रह गरेको छ । साथै पार्टीले बहिष्कारवादी टिम र सम्पूर्ण नेपाली जनतालाई कथित निर्वाचन बहिष्कारमा सक्रिय हुन आह्वान गरेको छ ।
