दाङ । नेपाली कांग्रेस लुम्बिनी प्रदेशले आसन्न निर्वाचनलाई लक्षित गर्दै निर्वाचन परिचालन समिति गठन गरेको छ । प्रदेशका उम्मेदवारहरूको पक्षमा प्रभावकारी चुनावी वातावरण बनाउन कांग्रेसले उपसभापति राजु खनालको संयोजकत्वमा समिति निर्माण गरेको हो ।
गठित समितिले लुम्बिनी प्रदेशका १२ वटै जिल्लामा रहेका २६ निर्वाचन क्षेत्रमा कांग्रेस उम्मेदवारहरूको अवस्था मूल्यांकन गर्ने, जनसमर्थन बढाउने तथा आवश्यक समन्वयको काम गर्ने जनाइएको छ ।
बाँकेको कोहलपुरमा बसेको प्रदेश समिति बैठकले उक्त समिति गठनको निर्णय गरेको हो । बैठकमा बोल्दै प्रदेश सभापति अमरसिंह पुनले सबै निर्वाचन क्षेत्रमा कांग्रेस उम्मेदवारको जित सुनिश्चित हुने गरी संगठन परिचालन गर्न निर्देशन दिए । उनले पार्टी पंक्तिलाई एकताबद्ध भएर चुनावी अभियानमा जुट्न आग्रहसमेत गरे ।
