भक्तपुर । मध्यपुरथिमि–२ सानोठिमीस्थित बाल सुधारगृहमा गएराति दुई समूहबीच झडप हुँदा तोडफोड र आगजनी भएको छ। झडपपछि सुधारगृह परिसर रणमैदानजस्तै देखिएको छ।
झडपका क्रममा सुधारगृहभित्र ढुंगामुढा भएपछि स्थिति तनावग्रस्त बनेको थियो। प्रहरीमाथि समेत ढुंगामुढा भएपछि सशस्त्र प्रहरीको टोली परिचालन गरी स्थिति नियन्त्रणमा लिइएको हो। आगजनीपछि भक्तपुर र काठमाडौंका दमकल प्रयोग गरी आगो निभाइएको प्रहरीले जनाएको छ।
हाल स्थिति नियन्त्रणमा रहेको भए पनि सम्भावित अवस्था भड्किन नदिन सुधारगृह क्षेत्रमा ठूलो संख्यामा सुरक्षाकर्मी तैनाथ गरिएको छ। झडपबाट भएको क्षतिको विवरण संकलन भइरहेको छ। सानोठिमी बाल सुधारगृहमा हाल १६९ जना बालबालिका रहेका छन्।
