दाङ । फागुण २१ गते हुने संसदीय निर्वाचन बहिष्कारको आह्वान गर्दै संसदीय चुनाव बहिष्कार संघर्ष समिति दाङले आज घोराहीमा ‘स्वाधीन संयुक्त सरकार र नयाँ संविधानका लागि आगामी संसदीय निर्वाचनको औचित्य, बहिष्कार तथा खारेजीको आवश्यकता’ विषयक अन्तरक्रिया कार्यक्रम सम्पन्न गरेको छ ।
कार्यक्रमका प्रमुख अतिथि नेपाल कम्युनिस्ट पार्टी (बहुमत) का सचिवालय सदस्य गम्भीर ले वर्तमान नोकरशाही संसदीय व्यवस्था नेपाली जनताको हितमा नरहेको बताउँदै यसलाई सशक्त रूपमा बहिष्कार गर्नुपर्ने धारणा राखे । उनले पटक–पटक संसदीय निर्वाचन भए पनि नेपाली जनताले सुशासन, रोजगारी, निःशुल्क शिक्षा र न्याय नपाएको प्रश्न उठाए ।
“भ्रष्टाचार दिनानुदिन बढ्दो छ, महँगी नियन्त्रण बाहिर छ, युवा शक्ति विदेश पलायन भइरहेका छन्, नागरिकता त्याग्नेको संख्या बढ्दो छ,” उनले भने, “दलाल, बिचौलिया, मिटरव्याजी, सहकारी ठग र शैक्षिक माफियाहरू नै उम्मेदवार बन्ने व्यवस्थाबाट श्रमिक र उत्पीडित जनताले कसरी न्याय पाउँछन् ?” उनले धेरैपटक जनताले भोट दिए पनि देशले निकास नपाएको भन्दै अहिलेको संसदीय चुनाव आवश्यक नभई बहिष्कार गर्नैपर्ने अवस्था आएको बताए । स्वाधीन संयुक्त सरकार गठन गर्दै वर्तमान संविधान खारेज गर्नुपर्ने संयुक्त संघर्ष समितिको माग रहेको उनको भनाइ थियो ।
त्यसैगरी नेपाली कम्युनिस्ट पार्टीका प्रतिनिधि विश्व आचार्य ले भने अहिलेको अवस्थामा चुनाव बहिष्कार आवश्यक नरहेको धारणा राखे । उनले आन्दोलनमा सँगै हिँडेकाहरू बाटो बिराएको टिप्पणी गर्दै चुनावलाई उपयोग गर्दै सत्तालाई प्रयोग गरेर जनसत्ता स्थापना गर्नुपर्ने बताए । बहिष्कारबाट देशले निकास नपाउने र कम्युनिस्टहरू फुट होइन, एकताबद्ध हुनुपर्ने उनको जोड थियो ।
वामपन्थी विश्लेषक तथा प्रतिरोध जनसंघर्ष समितिका संयोजक प्रमोद धिताल ले कम्युनिस्टहरूमा विषयको गहिराइमा नपुगी केवल बाह्य हस्तक्षेप मात्र देख्ने प्रवृत्ति बढेको बताए । आन्तरिक कमजोरी नदेखी बाह्य षड्यन्त्र मात्र देख्ने प्रवृत्ति समस्याको कारण भएको उनको भनाइ थियो । हालको परिस्थितिमा पार्टीगत धारणा भन्दा समग्र रूपमा हेर्दा चुनाव उपयोग गर्नु उपयुक्त हुने उनले बताए ।
कार्यक्रमको अध्यक्षता संयुक्त संघर्ष समितिका दाङका संयोजक हुकुम खड्का ले गरेका थिए भने सहजीकरण प्रज्वल सापकोटा ले गरेका थिए । कार्यक्रममा प्रमुख अतिथि नेकपा (बहुमत) का सचिवालय सदस्य गम्भीर, अतिथिहरूमा नेपाली कम्युनिस्ट पार्टीका प्रतिनिधि विश्व आचार्य र वामपन्थी विश्लेषक प्रमोद धिताल सहभागी थिए ।
संसदीय चुनावले देशलाई निकास नदिने र झनै संकटतर्फ धकेल्ने निष्कर्षसहित ६ कम्युनिस्ट पार्टीहरू ले आगामी फागुण २१ गते हुने संसदीय निर्वाचन बहिष्कार गर्दै स्वाधीन संयुक्त सरकार गठनको मागसहित संयुक्त रूपमा विभिन्न चरणका संघर्ष कार्यक्रम अघि बढाइरहेका छन् ।
