काठमाडौँ । प्रधानमन्त्री सुशीला कार्कीले दलीय गतिविधिमा संलग्न भएको आरोपमा तीन मन्त्रीलाई पद छाड्न निर्देशन दिएकी छन्। चुनावी गैरदलीय सरकारमा रहेर दलगत क्रियाकलापमा लागेको भन्दै शहरी विकासमन्त्री कुलमान घिसिङ, सञ्चारमन्त्री जगदिश खरेल र युवा तथा खेलकुदमन्त्री बब्लु गुप्तालाई राजीनामा दिन भनिएको हो।
प्रधानमन्त्री कार्कीले यसअघि व्यक्तिगत रूपमा आग्रह गरेकी थिइन् भने सोमबारको मन्त्रिपरिषद् बैठकमा पनि विषय उठाएकी हुन्। गैरदलीय सरकारको मर्म विपरीत मन्त्रीहरू चुनाव नजिकिँदै दलसँग सक्रिय भएपछि यस्तो निर्णय लिइएको बताइएको छ।
घिसिङले पार्टी दर्ता गरी चुनावी तयारी थालेका छन् भने खरेल र गुप्ता पनि दलसँग नजिकिँदै उम्मेदवार बन्ने तयारीमा छन्। यसले सरकारको गैरदलीय चरित्रमाथि प्रश्न उठेपछि प्रधानमन्त्रीले कडा कदम चालेकी हुन्।
