झापा — कनकाई नगरपालिका–४ अन्तर्गत पूर्व–पश्चिम राजमार्गमा आज बिहान शङ्कास्पद झोला फेला परेपछि सुरक्षा सतर्कता बढाइएको छ। कनकाई पुलको पूर्वतर्फ राजमार्गको छेउमा भेटिएको झोलाभित्र प्रेसर कुकर राखिएको र झोलाबाट तारजस्तो वस्तु बाहिर निस्किएको देखिएको हो।
स्थानीयले असामान्य वस्तु देखेपछि तुरुन्तै सुरक्षा निकायलाई खबर गरेका थिए। त्यसलगत्तै प्रहरी टोली घटनास्थलमा पुगेर क्षेत्र शिलबन्दी गरेको छ। प्रमुख जिल्ला अधिकारी शिवराम गेलालका अनुसार उक्त वस्तुको यकिन प्रकृति खुल्न बाँकी रहेकाले पहिचान र सुरक्षित रूपमा डिस्पोज गर्ने तयारी भइरहेको छ। जोखिम न्यूनीकरणका लागि सवारीसाधन र यात्रुहरूको आवागमन राजमार्गको अर्को छेउबाट सञ्चालन गरिएको छ।
जिल्ला प्रहरी कार्यालय झापाका प्रवक्ता खगेन्द्रबहादुर खड्काले शङ्कास्पद वस्तु निष्क्रिय पार्न नेपाली सेनाको डिस्पोजल टोलीलाई बोलाइसकिएको जानकारी दिए। सुरक्षा निकायले घटनास्थल वरपर थप निगरानी बढाएको छ र सर्वसाधारणलाई अनावश्यक रूपमा नजिक नजान आग्रह गरिएको छ।
