कञ्चनपुर । नेकपा (बहुमत) निकट कम्युनिस्ट युवा संगठन नेपाल, कञ्चनपुरको दोस्रो जिल्ला भेला सम्पन्न भएको छ। भेलाले राजवीर चन्द ठकुरीको अध्यक्षतामा ११ सदस्यीय जिल्ला समिति चयन गरेको छ।
कार्यक्रममा बोल्दै प्रमुख अतिथि ऐरीले राज्य जनताको आधारभूत अधिकारप्रति उदासीन बनेको आरोप लगाउँदै उनले शिक्षा र स्वास्थ्य नागरिकको मौलिक अधिकार भएकाले त्यसलाई निःशुल्क र सर्वसुलभ बनाइनु पर्नेमा जोड दिए । फाल्गुन २१ गतेको निर्वाचनअघि राज्यले शिक्षा र स्वास्थ्य निःशुल्क नगरे हामी बाध्य भएर चुनाव बहिष्कारको बाटो रोज्नेछौँ उनले भने । साथै उनले युवाहरूलाई संगठित र वैचारिक रूपमा सुदृढ हुँदै जनसंघर्षमा अगाडि बढ्न आह्वान गरे।
त्यस्तै, विशिष्ट अतिथि डीडी पाण्डेले वर्तमान राज्य व्यवस्था जनताप्रति जिम्मेवार नरहेको उल्लेख गर्दै जनपक्षीय राज्य स्थापनाका लागि संघर्ष अनिवार्य रहेको बताएका थिए । पार्टीका जिल्ला इन्चार्ज राम भट्टले समाजमा व्याप्त विभिन्न बेथिति, अन्याय र शोषणविरुद्ध लड्न युवाहरूको अग्रणी भूमिका अझ आवश्यक रहेको धारणा राखेका थिए।
भेलामा संगठनका सुदुर पश्चिम प्रदेश इन्चार्ज दिपेन्द्र ऐरी प्रमुख अतिथि तथा पार्टीको ७ नम्बर ब्युरो इन्चार्ज डीडी पाण्डे विशिष्ट अतिथिका रूपमा सहभागी हुनुहुन्थ्यो। कार्यक्रममा कञ्चनपुर जिल्ला पार्टी इन्चार्ज राम भट्ट, पार्टी सल्लाहकार समिति सदस्य डम्बर बिष्ट, जिल्ला सचिव नक्साल बिष्ट, कार्यालय सचिव सुरेन्द्र धानुक, पुष्कर भण्डारी तथा युवा संगठनका जिल्ला इन्चार्ज दीपक पाल लगायतका नेताहरूको उपस्थिति रहेको थियो।
