जाजरकोट — जाजरकोटमा सिकार खेल्ने क्रममा गोली लागेर एक युवकको मृत्यु भएपछि प्रहरीले पाँच जनालाई भरुवा बन्दुकसहित पक्राउ गरेको छ।
जिल्ला प्रहरी कार्यालय जाजरकोटका अनुसार पुस १३ गते बिहान बारेकोट गाउँपालिका–८ का ३६ वर्षीय प्रचण्डदेव सिंहसहित छ जना सिकार खेल्न जंगल गएका थिए। सोही क्रममा प्रचण्डदेव सिंहको गोली लागेर मृत्यु भएको थियो।
घटनाको अनुसन्धानका क्रममा घटनास्थल नजिकैको खाल्डोबाट भरुवा बन्दुकलगायत हतियार फेला परेपछि प्रहरीले सोही वडाका पाँच जनालाई नियन्त्रणमा लिएको हो।
पक्राउ पर्नेमा ४५ वर्षीय इन्द्रबहादुर सिंह, ५४ वर्षीय मीमबहादुर सिंह, २४ वर्षीय राजीव शाही, ४४ वर्षीय जनक कार्की र १९ वर्षीय लालबहादुर सिंह रहेका छन्।
उनीहरूबाट तीन थान भरुवा बन्दुक, दुई थान फलामे चक्कु, १३५.१८ ग्राम बारुद र भरुवा बन्दुकमा प्रयोग हुने २१ थान धातुका टुक्रा बरामद गरिएको प्रहरीले जनाएको छ। घटनाबारे थप अनुसन्धान भइरहेको छ।
