दाङ । राप्ती इन्जिनियरिङ कलेजमा विद्यार्थी लक्षित समसामयिक प्यानल डिस्कसन कार्यक्रम सम्पन्न भएको छ। कलेजको आईटी क्लबको आयोजनामा तथा राष्ट्रिय आविष्कार केन्द्रको सहकार्यमा सम्पन्न कार्यक्रममा साइबर सुरक्षा, कृत्रिम बुद्धिमत्ता (AI) र प्रविधिमा बढ्दो निर्भरता विषयमा केन्द्रित रहेर छलफल गरिएको थियो।
कार्यक्रममा आजको डिजिटल युगमा प्रविधिको बढ्दो प्रभावसँगै साइबर अपराध, डाटा चोरी, अनलाइन ठगीजस्ता जोखिमबारे सचेत गराइएको थियो। प्यानलिस्टहरूले सुरक्षित पासवर्ड, दुई-तह प्रमाणीकरण, सार्वजनिक Wi-Fi प्रयोग गर्दा अपनाउनुपर्ने सावधानी र व्यक्तिगत डाटा संरक्षणका उपायबारे व्यवहारिक जानकारी दिएका थिए।
यस्तै, एआईले रोजगारीमा पार्ने प्रभावबारे छलफल गर्दै केही परम्परागत काम स्वचालित भए पनि नयाँ अवसर र सीपको माग बढ्दै गएको बताइएको थियो। एआईसँग सहकार्य गर्न सक्ने दक्ष जनशक्तिको आवश्यकता बढिरहेकोमा जोड दिइयो।
कार्यक्रममा विभिन्न संकायका विद्यार्थीहरूको उल्लेखनीय सहभागिता रहेको थियो। कलेज प्रशासन तथा शैक्षिक नेतृत्वको उपस्थितिले कार्यक्रमलाई थप प्रभावकारी बनाएको आयोजकले जनाएको छ।
