नेपाल प्रिमियर लिग (एनपिएल)को दोस्रो संस्करणको उपाधि जितेको लुम्बिनी लायन्सले पुस ५ गतेदेखि लुम्बिनी प्रदेशका विभिन्न जिल्लामा ‘ट्रफी सेलिब्रेसन टुर’ सुरु गर्ने भएको छ।
क्लबले सार्वजनिक गरेको कार्यक्रमअनुसार टुर बाँके र बर्दियाबाट सुरु भई पुस १५ गते रुपन्देहीमा पुगेर समापन हुनेछ। पहिलो दिन नेपालगञ्जको बागेश्वरी मन्दिरदेखि गुलेरिया र भन्सागढीदेखि कोहलपुरसम्म ट्रफी प्रदर्शन गरिनेछ।
टुर पुस ६ गते दाङको तुल्सिपुर–घोराही, पुस ७ गते रुकुमको रुकुमकोट–खलङ्गा, पुस ८ गते रोल्पाको लिवाङ–सुलिचौर, पुस ९ गते प्युठानको भिङ्ग्री–स्वर्गद्वारी हुँदै अगाडि बढ्नेछ। पुस १० गते विजुवार बरुङ्लादेखि भालुवाङसम्म ट्रफी यात्रा हुनेछ।
त्यसैगरी पुस ११ गते कपिलवस्तु, पुस १२ गते अर्घाखाँची, पुस १३ गते गुल्मी, पुस १४ गते पाल्पा र पुस १५ गते नवलपरासी तथा रुपन्देहीमा ट्रफी सेलिब्रेसन टुर आयोजना गरिनेछ। पुस १६ गते बुटवलमा विशेष टुरसहित मेगा कन्सर्ट पनि हुने जनाइएको छ।
एनपिएल फाइनलमा लुम्बिनी लायन्सले सुदूरपश्चिम रोयल्सलाई ६ विकेटले पराजित गर्दै उपाधि हात पारेको थियो। प्रतियोगिताको क्रममा लुम्बिनीले विराटनगर किङ्स र काठमाडौँ गोर्खाजलाई पनि पराजित गरेको थियो।
