काठमाडौं । नेकपा (माओवादी केन्द्र) ले आफ्नो सातौं पूर्ण बैठक सम्पन्न गर्दै संगठनात्मक रूपान्तरणदेखि आन्तरिक सुधारका ठूला निर्णयहरु सार्वजनिक गरेको छ ।
बैठकले अध्यक्ष पुष्पकमल दाहाल ‘प्रचण्ड’ को संयोजकत्वमा केन्द्रीय समितिलाई महाधिवेशन आयोजक समितिमा रूपान्तरण गर्ने र पदाधिकारीलाई सो समितिको सचिवालयमा परिणत गर्ने निर्णय गरेको छ । पार्टीको महाधिवेशन मंसिर महिनामै गर्ने निष्कर्षमा बैठक पुगेको छ ।
बैठकमा प्रचण्डले आफूमाथि समेत लागेको नातावाद (नेपोटिज्म) को आलोचना स्वीकार गर्दै बैठकले सम्पत्ति छानबिनका लागि शक्तिशाली आयोग गठन गर्ने र पारिवारिक सदस्यहरूको भूमिकाबारे स्पष्ट कार्यविधि बनाएर अघि बढ्ने निर्णय गरेको छ । त्यस्तै, संस्कार, कार्यशैली र अनुशासनसम्बन्धी नयाँ नीति ल्याउने तयारी पनि बैठकको निष्कर्षमा समेटिएको छ ।
पार्टी कमिटीहरूमा अधिकतम सहभागिता सुनिश्चित गर्ने, युवालाई प्राथमिकतामा राख्ने र सूचना प्रविधिलाई उच्च प्राथमिकतामा राखेर काम गर्ने प्रतिबद्धता पनि माओवादी केन्द्रले जनाएको छ ।
अध्यक्ष प्रचण्डले प्रस्तुत गरेको मूल प्रस्ताव पारित गर्दै वरिष्ठ उपाध्यक्ष र उपमहासचिवले राखेका सुझावलाई निरन्तर छलफल गर्दै महाधिवेशनसम्म लैजाने सहमति बनेको छ । साथै, विचार मिल्ने अन्य राजनीतिक शक्तिसँग एकता गर्ने विषयलाई पनि बैठकले महत्व दिएको छ ।
