काठमाडौं असोज १० । नेकपा माओवादी केन्द्रको केन्द्रीय समितिमा अध्यक्ष पुष्पकमल दाहाल ‘प्रचण्ड’ले प्रस्तुत गरेको प्रस्तावलाई लिएर शीर्ष नेताहरूबीच मतभेद देखिएको छ ।
प्रचण्डले मंसिरमा विशेष महाधिवेशन गरी पदाधिकारी र केन्द्रीय समिति भंग गर्ने प्रस्ताव अघि सारेका थिए । तर वरिष्ठ उपाध्यक्ष नारायणकाजी श्रेष्ठ र उपमहासचिव जनार्दन शर्माले उक्त प्रस्तावप्रति असहमति प्रकट गरेका छन् ।
श्रेष्ठले मंसिरमै महाधिवेशन सम्भव नभएको भन्दै निर्वाचन सम्पन्न भएपछि मात्र महाधिवेशन गर्नुपर्ने धारणा राखे । उनले अहिलेको प्राथमिकता आगामी फागुन २१ गते तोकिएको प्रतिनिधि सभा निर्वाचन सफल बनाउनुपर्ने बताएका छन् । त्यस्तै, उपमहासचिव शर्माले सबै पदाधिकारीले राजीनामा दिई निर्देशक समितिको मार्गदर्शनमा नयाँ पुस्तालाई नेतृत्व हस्तान्तरण गर्ने वैकल्पिक प्रस्ताव पेश गरेका छन् ।
भदौ २३–२४ मा भएको जेनजी आन्दोलनपछि तत्कालीन प्रधानमन्त्री केपी शर्मा ओलीले राजीनामा दिएपछि अन्तरिम सरकार गठन भएको र त्यसको सिफारिसमा प्रतिनिधि सभा विघटन भई चुनावको तयारी भइरहेको सन्दर्भमा माओवादी केन्द्रभित्रको आन्तरिक बहस अझ चर्किएको छ ।
